Spanja do t’u mundësojë të gjithë udhëtarëve të vaksinuar që ta vizitojnë këtë shtet nga 7 qershori, ka thënë kryeministri spanjoll Pedro Sanchez të premten, teksa bëhen përpjekje për ringjallje të industrisë së turizmit. “Nga 7 qershori, të gjithë personat e vaksinuar dhe familjet e tyre do të mirëpriten në shtetin tonë, pavarësisht vendit të origjinës”, ka thënë Sanchez në një panair ndërkombëtar të turizmit në Madrid. Ai po ashtu ka njoftuar se udhëtarët nga Britania e Madhe mund ta vizitojnë Spanjën për pushime që nga java tjetër. I njohur si vendi i dytë më popullor për turistët pas Francës, Spanja pati regjistruar 83.5 milionë vizitorë të huaj më 2019, sipas të dhënave zyrtare. Në 2020-ën, numri i turistëve të huaj që kanë vizituar Spanjën ra me 77 për qind, në krahasim me një vit më parë, si pasojë e kufizimeve për shkak të pandemisë së koronavirusit. Spanja pret që këtë vit të vizitohet nga 45 milionë turistë të huaj. Në gjithë botën, turizmi ka qenë një prej sektorëve më të dëmtuar nga pandemia. Sipas Organizatës Botërore për Turizmin, që funksionon në kuadër të Kombeve të Bashkuara, lëvizjet e turistëve besohet të kenë rënë me 74 për qind në vitin 2020, në krahasim me 2019-ën. Pamjet: AFP