Një operacion i autoriteteve spanjolle çoi në prangosjen e 30 personave, sekuestrimin e 2.5 kilogramëve kokainë dhe mbi 5 milionë euro pasuri në formën e pasurive të patundshme dhe parave Cash. Policia spanjolle njoftoi se operacioni është epilogu i një hetimi dyvjeçar, ku janë goditur tre grupe kriminale, që siç pohojnë autoritetet spanjolle ishin mjaft aktivë në trafikun e kokainës nga Kolumbia dhe vendet e tjera të Amerikës Latine drejt Europës. Në total janë ndërmarrë 19 kontrolle, ndërsa 30 të arrestuarit janë pjesë e atij që autoritetet spanjolle e konsiderojnë si karteli ballkanik i trafikut, i përbërë kryesisht nga shqiptarë, serbë dhe boshnjakë. Hetimi filloi pas sekuestrimit të 88 kilogramëve kokainë brenda një automjeti në qytetin Malaga, në tetor 2024. Gjatë këtij hetimi, agjentët zbuluan tre organizata kriminale të dedikuara për kontrabandën e drogës në Spanjë. Njëri prej grupeve ishte i lidhur me Kartelin Ballkanik që zotëronte drogën, ndërsa tjetri, i përbërë nga shtetas kolumbianë, vepronte si në vendin e tyre të lindjes ashtu edhe në Spanjë.