Spanja ka mobilizuar ushtrinë pasi mijëra emigrantë sulmuan një pikë kalimi kufitar, duke bërë që vendasit e tmerruar të mbyllin dyqanet, restorantet dhe baret. Të paktën 18 persona kanë humbur jetën ndërsa përpiqeshin të notonin drejt Ceutës, një enklavë spanjolle në Afrikën veriore që po sheh valë emigrantësh që mbërrijnë në brigjet e saj. Autoritetet lokale i kërkuan qeverisë të shpallë një emergjencë kombëtare, ndërsa rojet kufitare të mbingarkuara luftojnë për t'u përballur me fluksin. Kjo e ka shtyrë Madridin të mobilizojë njësitë e ushtrisë për të mbështetur Rojën Civile që ende po merret me emigrantët që mbërrinin pas muzgut. Tanke dhe ushtarë janë fotografuar duke dalë në rrugë ndërsa mbyllën kufirin me Marokun. Kryeministri spanjoll Pedro Sanchez gjithashtu do të vizitojë enklavën gjatë ditës. Pronarët e bizneseve lokale vendosën të mbajnë qepenat e tyre të mbyllura ndërsa mijëra njerëz përmbytën qendrën e qytetit. Banorët thuhet se kanë frikë për sigurinë e tyre për shkak të një rreziku të lartë plaçkitjesh dhe trazirash. Presidenti i Ceutës, Juan Jesus Vivas, nxitoi të shpallte një emergjencë totale humanitare dhe sociale. “Në ditët e fundit, më shumë se 1,500 migrantë, si të rritur ashtu edhe të mitur, kanë ardhur në Ceuta nga deti. Qendrat e pritjes janë të mbushura, nuk ka më vend për askënd në to dhe sipas shifrave të djeshme, numri i njerëzve që hyjnë është më shumë se 200 në ditë”, tha ai. Gjykata Supreme e Spanjës, është kritikuar për vendimin se migrantët që mbërrijnë nga deti nuk duhet t'i nënshtrohen dëbimit të menjëhershëm, pasi nuk po kalojnë një kufi fizik tokësor.