Prokuroria e Posaçme ka dhënë detaje në lidhje me operacionin kundër një Call Centeri të vendosur pranë shkollës Sami Frashëri në Tiranë. Sipas SPAK, në shënjestër të aktivitetit të tij ishin shtetas francezë, të cilëve në një periudhë prej pak muajsh u kanë grabitur përmes mashtrimit të paktën 1.1 milionë euro. SPAK thotë se hetimi ka nisur pas sinjalizimeve nga Eurojust, që ishte vënë në lëvizje prej autoriteteve franceze, që kishin marrë në fund të vitit 2023 denoncime nga disa qytetarë për mashtrim me skemat e investimit në kriptomonedha. Hetimet e francezëve kishin identifikuar shoqërinë Universal Trade, që vepronte përmes faqes universaltrade.io. Francezët dyshonin se platforma në fjalë drejtohej nga Shqipëria. Sipas SPAK, viktimat kontaktoheshin nga agjentë me identitete të rreme franceze, të cilët i udhëzonin qyetarët të investonin në kriptomonedha, përmes kësaj platforme me premtimin e kthimit shumëfish si fitim.