Prokuroria e Posaçme anti-korrupsion ka dorëzuar në Ministrinëë e Drejtësisë kërkesën për nisjen e menjëhershme të procedurave të ekstradimit të Behar Bajrit nga Franca. Kërkesa është dorëzuar këtë të enjte, bashkë me vendimin e gjykatës së posaçme, që ka caktuar ndaj Bajrit masën e sigurisë arrest me burg. Shqipëria nuk ka një marrëveshje të nënshkruar ekstradimi me Francën, megjithatë, tentativa do të bëhet përmes shfrytëzimit të konventave ndërkombëtare të të drejtave të njeriut për të bindur gjykatën franceze që të autorizojë ekstradimin. Dosja do të përpilohet e plotë dhe përmes Ministrisë së Drejtësisë do t’u vihet në dispozicion autoriteteve franceze.