Prokuroria e Posaçme ka marrë zyrtarisht të pandehur ish kryebashkiakun e Kavajës, Elvis Rroshi. Rroshi u paraqit këtë të hënë në ambientet e SPAK, ku i shoqëruar nga avokati i tij u njoh me statusin e ri që ka në lidhje me hetimet e SPAK për shpërdorim detyre. Rroshi dyshohet se ka abuzuar me dy tendera në kuadër të projekteve për rilindjen urbane të qytetit të Kavajës me vlerë totale prej 33 milionë euro. Çështja u kallëzua nga Kontrolli i Lartë i Shtetit në Gjykatën e Durrësit. Kjo e fundit caktoi moskompetencë dhe përcolli dosjen për në Gjykatën e Posaçme. Gjykata e Posaçme urdhëroi SPAK në mars të vitit të kaluar që të hetojë ish kryebashkiakun e Kavajës.