Agjentët e Byrosë Kombëtare të Hetimit me kërkesë të SPAK kanë zhvilluar kontrolle për dosjen “Balluku”. Sipas burimeve, kontrollet janë zhvilluar në disa banesa e zyra në Tiranë e Vlorë në kuadër të hetimeve që po zhvillohen për çështjen e Tunelit të Llogarasë dhe lotin 4 të Unazës së Madhe në kryeqytet. Belinda Balluku u mor e pandehur në tetor të vitit 2025 për akuzën e shkeljes së barazisë me tenderin e Tunelit të Llogarasë. Më pas ajo u vendos nën akuzë dhe për lotët e unazës së madhe ndërsa GJKKO caktoi ndaj saj masën e sigurisë Pezullim nga detyra dhe ndalim i daljes jashtë shtetit. Balluku është e dyshuar për 3 procedura të tjera tenderuese ndërsa pozita e saj penale është rënduar, pasi krahas veprës penale të shkeljes së barazisë në tenderë, SPAK i ka regjistruar edhe akuzat e korrupsionit dhe pastrimit të parave. Akuzë kjo që lidhet gjatë kohës që ishte në krye të ALBCONTROL. Sipas SPAK, Balluku kishte favorizuar një kompani në tenderin për rindërtimin e një godine teknologjike të Albcontrolit, për një shumë prej 929.000 eurosh, ndërsa iu sekuestrua dhe një vilë në një resort turistik në Dhërmi.