SPAK ka nisur hetimet për çështjen e pagave të magjistratëve. Vetëm një javë pasi gjyqtarë e prokurorë dorëzuan kallëzimin ndaj titullarëve të Ministrisë së Financave, mes të cilëve ministri Petrit Malaj, për bllokimin e rrogave, SPAK mësohet se ka sekuestruar të gjithë praktikën dokumentare në këtë institucion. Në kallëzim krahas Petrit Malajt ishte dhe Sekretari i Përgjithshëm i dikasterit të drejtuar prej tij, Gentian Këri rfshin edhe përgjegjësit e 14 degëve të thesarit në Tiranë dhe rrethe. Kallëzimi u firmos nga drejtuesit gjykatave të apelit administrative dhe penal, nga drejtuesit e gjykatave të rretheve dhe nga krerët e shoqatave të gjyqtarëve dhe prokurorëve. Objekti i padisë ngrihet me dyshimet për shpërdorim detyre, pengim të ekzekutimit të vendimeve të gjykatës dhe mosekzekutim të vendimeve të gjykatës pa shkaqe të përligjura. Ministri Malaj kallëzohet për shpërdorim detyre dhe mosrespektim të vendimit të Gjykatës Kushtetuese nisur nga shkresa që u ka kthyer institucioneve të drejtësisë, duke u kërkuar që të dorëzojnë listëpagesat sipas përllogaritjes së bërë para 31 korrikut. Sipas gjyqtarëve dhe prokurorëve, shkresa shpërfill vendimin e Gjykatës Kushtetuese. Ndërkohë, Sekretari i Përgjithshëm i Ministrisë së Financave, Gentian Këri kallëzohet për të njëjtat vepra penale pasi ka urdhëruar përmes postës elektronike përgjegjësit e degëve të thesarit në vend që të mos kalojnë pagat për punonjësit e drejtësisë. Kallëzuesit theksojnë se si pasojë e bllokimit të mësipërm, magjistratët megjithëse kanë ushtruar rregullisht funksionin e tyre gjatë muajit gusht 2026, kanë mbetur pa marrë pagesën për punën e kryer.