‘Masakër elektorale’ e ka konsideruar Partia Demokratike 25 Prillin. Enkelejd Alibeaj ka akuzuar Prokurorinë e Posaçme kundër korrupsionit dhe krimit të organizuar për mosveprim ndaj kallzimeve të depozituara nga demokratët. “Megjithëse kishte 3 javë në dispozicion, SPAK heshti duke lejuar mercenarët e aleancës Rama- Doshi-Rakipi të zbatojnë skemën kriminale të blerjes së votave. SPAK u njoftua përmes kallëzimit tonë se Tom Doshi i shpallur non-grata nga Departamenti Amerikan i Shtetit, Filip Gjeloshi dhe Pal Gjeloshi, elementë kryesorë të botës së krimit në Tiranë, të përfshirë në vepra penale si vrasje, rrëmbim personi dhe shumë të tjera, janë duke blerë vota në favor të kandidatit Tom Doshi. Secilit prej të punësuarve në bizneset e kandidatit Doshi i është kërkuar prerazi të votojë dhe të sigurojë 20 emra dhe karta ID si vota të sigurta për Doshin, përndryshe do të pushoheshin nga puna.” Ky reagim vjen në vazhdën e deklaratave të shumta të demokratëve për mosnjohjen e rezultatit të zgjedhjeve të cilat kanë filluar që pas afishimit të mandateve të fituara, moment ky kur vetë kryedemokrati Basha nuk i njohu zgjedhjet, nuk foli për përgjegjësi, por deklaroi se beteja sapo ka filluar.