Një zyrtar i drejtorisë së Urbanistikës në Bashkinë e Sarandës është shoqëruar mbrëmjen e së enjtes në drejtim të Tiranës, pas një operacioni të ndërmarrë nga Prokuroria e Posaçme. Burimet konfirmojnë se Arial Balani është ndaluar në Ksamil. Ai më pas është shoqëruar në Komisariatin e Sarandës dhe më pas është nisur drejt Tiranës. SPAK nuk ka dalë ende me një njoftim zyrtar në lidhje me këtë operacion, por Balani dyshohet se me veprimet dhe mosveprimet e tij si zyrtar në zyrën e urbanistikës së qytetit ka shpërdoruar detyrën dhe ka përfituar rryshfet nga qytetarë që kanë ndërtuar objekte pa leje. Parregullsitë, sipas burimeve, paraprakisht dyshohet se janë zbuluar gjatë një operacioni të IKMT-së disa muaj më parë në zonën e Ksamilit për shembjen e ndërtimeve pa leje. Në këtë operacion është zbuluar gjithashtu se një pjesë e ndërtimeve në terren nuk përputheshin me hartën e urbanistike të qytetit. Hetimet në lidhje me këtë rast po vijojnë për të mësuar nëse ka persona të tjerë të përfshirë në këtë dosje.