Mustafa Martinaj, babai i ‘bosit të lojërave të fatit’ Ervis Martinaj, është paraqitur këtë të enjte për herë të tretë në GJKKO, ku dëshmoi për gjyqin për pasuritë e të birit. Ai ka deklaruar në seancë se Ervis Martinaj ushtronte aktivitetin e lojërave të fatit me licencë, duke paguar detyrimet ligjore. Mustafaj Martinaj ka rrëfyer sesi djali i tij në vitin 2018 lëvizi nga Tirana dhe shkoi të jetonte me të në Laç, ku sipas tij qëndroi deri ditën kur u zhduk, më datën 9 gusht 2022. Martinaj tha gjithashtu se pas zhdukjes së të birit policia i ka shkuar 23 herë në shtëpi. Për banesën të cilën Ervis Martinaj i kishte falur Elio Hatos, ai shprehu se i biri e bëri në shenjë respekti sepse ky i fundit i kishte shpëtuar jetën. “Nga 2008 e pas, djali është marrë me pika lotosh me licencë, detyrim 100% të paguara nga kompania si dhe ato vendore. Të parën pikë se mbaj mend ku e ka hapur. Po të më pyeste mua do i thoja ‘jo’. Me djalin kam folur dhjetëra herë për aktivitetin e tij. Një pasuri që sot është e sekuestruar në emër të Bisere Hatos ja ka falur im bir, Eljo Hatos se i ka shpëtuar jetën Visit. Të parën makinë të mirë që ka pasur djali ka kushtuar 60 mijë euro, ose 48 mijë euro, me paratë e mia. Në jetën e vet s’më ka sjell shqetësim tek shtëpia. Nuk ka të ri që s’ka konflikte apo zënka, deri në 2018 kurrë, pyesni në Laç, të flasë dikush keq, i përmendej emri me respekt. Mua që më sheh këtu, invalid siç isha, kam qarkulluar tek pullë i vetëm nga Tirana me mbi 800 mijë dollar cash, karta e telefona në 12 të natës, në periudhën më të vështirë, në ‘99, bandat ishin rrugës”.