Sllovakët u janë drejtuar kutive të votimit për të shprehur vullnetin e tyre në zgjedhje të parakohshme, pas rënies së ish-qeverisë së qendrës së djathtë. Sondazhet nxjerrin në avantazh partinë populiste SMER, të Robert Fico, i cili ka premtuar një fund të menjëhershëm të mbështetjes ushtarake sllovake për Ukrainën. Fico u detyrua të jepte dorëheqjen si kryeministër pas vrasjes së gazetarit investigativ Jan Kuciak në 2018. "Nëse SMER hyn në qeveri, ne nuk do të dërgojmë asnjë raund të vetëm municioni në Ukrainë," u tha Fico së fundmi mbështetësve. Kjo deklaratë ka vënë në alarm edhe kryeqytetet perëndimore, që po shohin çdo ditë e më shumë shenja çarjeje në unitetin mes NATO-s dhe BE-së, megjithatë nga ana listët vendas, deklarata e Ficos shihet si një retorikë populiste. Kjo pasi Bratislava ka qenë një aleat besnik dhe i palëkundur, duke furnizuar Kievin me raketa dhe helikopterë tokë-ajër, madje duke dhuruar të gjithë flotën e saj të avionëve luftarakë MiG-29, që e kishte jashtë përdorimit. Thënë ndryshe, edhe nëse do të ekzistojë vullneti, tashmë Sllovakia nuk ka më armatime për të dhuruar apo shitur te Ukraina.