Policia britanike dërgoi një ekip për asgjësimin e bombave në aeroportin Gatëick të Londrës pasi një send i dyshuar, u zbulua në bagazhe, thanë autoritetet të premten, pas evakuimit të mëparshëm të një terminali pasagjerësh. Policia e Sussexit, forca lokale, tha se një kordon sigurie do të mbetet në vend ndërsa çështja po hetohet. Gatëick, aeroporti i dytë më i ngarkuar i Britanisë i cili ndodhet rreth 50 km në jug të Londrës, tha më herët se kishte evakuuar një pjesë të madhe të terminalit të tij jugor, duke përmendur një incident sigurie. "Policia u thirr në Terminalin jugor në Aeroportin Gatëick në orën 8:20 të mëngjesit të së premtes pas zbulimit të një sendi të dyshuar në bagazh," tha Policia e Sussex në një deklaratë. "Si një masë paraprake, një ekip i skuadrës së asgjësimit të bombave u vendos në aeroport." Autoritetet e aeroportit thanë në platformën X se pasagjerët po mbaheshin jashtë ndërtesës ndërsa incidenti ishte në hetim, ndërsa policia tha se kishte një ndërprerje të konsiderueshme të trafikut në zonë dhe këshilloi njerëzit që ta shmangnin atë. Në një incident të veçantë më herët të premten, policia e Londrës kreu një shpërthim të kontrolluar pranë ambasadës së SHBA në jug të Londrës, pasi zbuloi një pako të dyshimtë atje.