Kryeministri Edi Rama ka reaguar ndaj shqetësimeve të shprehura në rrjetet sociale lidhur me mbulimin e monumentit të heroit kombëtar, Gjergj Kastrioti Skënderbeu, në sheshin “Skënderbej” të Tiranës. Teksa komentet i konsideron “kua-kua-kua këmbëngulëse në kënetën sociale”, Rama sqaron se arsyeja është marrja e formave për realizimin më pas të një kopjeje të monumentit që do të vendoset në sheshin “Gjergj Kastrioti Skënderbeu” në Paris. “Pas një përpjekjeje diplomatike të gjatë e të suksesshme, pikërisht sepse sot Shqipëria dëgjohet me respekt, kemi arritur të marrim miratimin e autoriteteve franceze për të vendosur monumentin e Heroit tonë Kombëtar në një shesh të Parisit me emrin e tij”, shton mes tjerash kryeministri. Ndërkohë sqaroi se skela e ngritur do të hiqet brenda disa ditëve, duke shtuar me tëj me nota ironie se pas kësaj, të gjithë ato që janë shqetësuar, do të heqin mallin me kalin e Skënderbeut dhe do t’u duhet të gjejnë një tradhëti tjetër për ta akuzuar.