Sali Berisha zhvilloi një takim me Departamentin e Çështjeve Sociale, në selinë e PD-së. Në fjalën e tij, lideri i PD-së u shpreh se minimumi jetik është emergjenca më e madhe në këto 13 vite dhe se ajo duhet të jetë të paktën 200 euro. “Nuk ka njerëz më të keqtrajtuar, më të shpërfillur se pensionistët shqiptarë, gjë të cilën nuk e meritojnë kurrë këtë. Vetëm me minimumin jetik, duke garantuar për çdo qytetar të këtij vendi jo më pak se 200 euro, pra një minimum jetik prej 200 eurosh, do mund të krijohet, të ndryshohet situata e dhimbshme në të cilën ndodhemi sot. Nuk ka asnjë pengesë për vendosjen e minimumit jetik. Dhe minimumi jetik nuk mund të jetë përgjigjja e vetme ndaj kësaj situate” Kreu i partisë demokratike kritikoi sërish qeverinë për shpërdorime të mëdha sipas tij në buxhetin e shtetit dhe tha se “Shqipëria është i vetmi vend në Europë, në të cilin euro ka pësuar një zhvlerësim dramatik prej 35%”.