Qëndrimi në paraburgim i ish-Presidentit, Ilir Meta është bërë çështje edhe në Parlamentin e Maqedonisë së Veriut. Zv.kryeministri dhe ministri i Infrastrukturës, Alexandar Nikolovski, ka mbajtur një fjalim gjatë një seance plenare ku ka kritikuar opozitën e vendit të tij për afrimin me kryeministrin Rama, të cilin e ka quajtur pasardhës të diktatorit Enver Hoxha. “Shkuam në UNESCO, ja këtu janë kolegët, ata thonë spiunët kryesor nga shtëpia u vijnë, nga brenda, ju vjen. Po e spiunoni shtetin. Por, për Pogradecin nuk spiunoni, sepse nuk keni forcë të spiunoni për atje, të kundërshtoni Edi Ramën dhe të tregoni çfarë po bëjnë ata në atë anë. Dhe, shkoni te Enver Hoxha, i përuleni atij, i cili është paraardhësi i Partisë Socialiste që tani po e udhëheq Edi Rama. Ai qe eshte ultra demokratik, apo? Paraardhësin me forcë e dërgoi në burg. Po, po, kryetari i mëparshëm i Partisë Socialiste, kryeministër, kryetar i Kuvendit, ministër i Punëve të Jashtme dhe president i shtetit, së pari e rrahu dhe pastaj e la në paraburgim. Nuk ka dosje, por dy vjet po e mban në paraburgim. Një personi të tillë i përuleni dhe i njëjti është miku juaj. Kështu që, populizmi gjithmonë i godet qytetarët në kokë. Dhe, do të jem i drejtpërdrejt, arsyeja pse në zonat urbane të Shkupit, në Ohër dhe këtu përreth- dhe këtu e përfundoj, çmimi i katrorit të banesave është kjo, është partia politike “E Majta” dhe hysteria që ka krijuar urbanizmi”, vijoi më tej zv.kryeministri Nikolovski. Kreu i lartë i shtetit në Maqedoninë e Veriut, po ashtu akuzohet se ka ndërtuar një vilë pa leje në Liqenin e Ohrit, zonë e mbrojtur nga UNESCO. Nikolovski, i cili është një prej figurave më të rëndësishme të VMRO-DPMNE, partia e ish-kryeministrit Nikola Gruevski, është gjithashtu një njeri i afërt i ish-Presidentit Meta, por edhe një aleat besnik i kryeministrit hungarez, Viktor Orban. Gjatë fjalimit të mbajtur në Parlament, Nikolovski tha se Ilir Meta po qëndron në paraburgim, megjithëse ndaj tij nuk ka asnjë dosje. Ish-Presidenti Ilir Meta ka marrë disa herë mesazhe mbështetje nga funksionarë të lartë të VMRO-DPMNE-së dhe në zgjedhjet e fundit parlamentare në Maqedoninë e Veriut ka bërë thirrje për të votuar partinë e ish-kryeministrit Gruevski.