Mjaftoi një deklaratë e presidentit amerikan Donald Trump se mund të pushtonte ishullin Kharg në Iran që nafta të kapërcente pragun prej 115 dollarë për fuçi. Raportime nga media amerikane sugjerojnë se në tryezë janë skenarë që variojnë nga pushtimi deri te bllokimi i ishullit, me synim rritjen e presionit ndaj Iranit për të garantuar funksionimin e lirë të Ngushticës së Hormuzit, një arterie jetike për tregtinë globale të naftës. Burime pranë Pentagonit kanë konfirmuar përgatitje të detajuara për një ndërhyrje të mundshme tokësore, ndërsa SHBA ka shtuar praninë ushtarake në rajon me mijëra trupa dhe mjete detare. Kjo lëvizje e Trump vjen në sajë të faktit që ishulli Kharg mbetet thelbësor për ekonominë iraniane, pasi përmes tij kalon pjesa dërrmuese e eksporteve të naftës, ndaj ky vendim do të dobësonte kundërshtarin ekonomisht, ndonëse efektet anësore do të ndihen bë xhepat e të gjithëve. Analistët vlerësojnë se çdo ndërhyrje do të kishte pasoja të mëdha jo vetëm për Iranin, por edhe për tregjet globale të energjisë, duke rritur ndjeshëm çmimet dhe rrezikun e destabilizimit në gjithë rajonin e Lindjes së Mesme.