Buxheti i 2025-ës shqyrtohet në parim në një seancë maratonë në Kuvend, ku demokratët kanë paralajmëruar protestë. Miratimi në parim vjen pas dëgjesës me institucionet, të cilat kanë kërkuar disa rishikime buxhetore. Skema e pensioneve pritet të marrë një peshë të madhe në diskutime. Zëvendësguvernatorja e Bankës së Shqipërisë, Luljeta Minxhozi në komisionin e ekonomisë, vlerësoi se skema e sigurimeve shoqërore vijon të jetë një barrë e madhe mbi financat publike. Deficiti nga kjo skemë për vitin 2025 parashikohet rreth nivelit 2% të PBB-së, duke përbërë dhe 75% të deficitit të përgjithshëm buxhetor. Banka e Shqipërisë vlerëson se sfida e sistemit të pensioneve bëhet edhe më serioze po të marrim në konsideratë dhe problemet demografike me të cilat po përballet vendi, të diktuara si nga plakja e popullsisë ashtu edhe nga emigrimi i forcës së aftë për punë.