Një mësues që rezulton të jetë i dënuar për “pedofili” dhe “ngacmim seksual” të fëmijëve është rikthyer të japë mësim në një nga shkollat 9 vjeçare të qytetit të Beratit. Bëhet fjalë për 62-vjeçarin Ëngjëll Bregu, i cili është emëruar mësues për lëndët e Fizikës dhe Informatikës në shkollën ’22 Tetori’. Denoncimi ka ardhur nga prindërit e nxënësve, teksa këta të fundit shprehen të shqetësuar se kanë frikë gjatë orëve të mësimit të Ëngjëll Bregut. Mësuesi 62-vjeçar është dënuar në vitin 2003 me 7-muaj burg nga Gjykata e Beratit nën akuzat për “pedofili” dhe “ngacmim seksual”, pas denoncimit të disa nxënësve të shkollës 9-vjeçare “Uznovë”. Ata e cilësuar mësuesin e tyre kujdestar si maniak seksual dhe pedofil i rrezikshëm, pasi pretendonin se gjatë një ekskursioni në Bogovë ai i kishte prekur në pjesët intime të trupit. Gjithsesi, gjykata nuk ja hoqi asokohe të drejtën e rikthimit në detyrë edhe pse u kërkua nga prokuroria. Pas kryerjes së dënimit, ai u rikthye sërish në detyrë deri në vitin 2009, kur u denoncua sërish se prekte vajzat në pjesët intime. Denoncimi u bë nga 13 prindër të nxënësve të shkollës 9-vjeçare në fshatin Çiflik të Dimalit, të cilët dërguan asokohe një peticion në Drejtorinë Arsimore të Beratit. Pas këtij peticioni, Ëngjëll Bregu u pezullua nga detyra por për shkak se denoncimi nuk u bë në polici, ai nuk u arrestua sërish. Pas më shumë se një dekade, Ëngjëll Bregu është rikthyer sërish të japë mësim, pasi prej 1-jave është emëruar në shkollën 9-vjeçare “22 Tetori” të Beratit.