Vazhdimi i seancës konstituive të Kuvendit të Kosovës do të mbahet të shtunën, në orën 11:00, pavarësisht se afati 30-ditor i përcaktuar nga Gjykata Kushtetuese për përfundimin e konstituimit skadon këtë të premte në mesnatë. Sipas njoftimit të Kuvendit, seanca do të vijojë aty ku ka mbetur, përkatësisht me zgjedhjen e kryetarit dhe pesë nënkryetarëve të Kuvendit. Vendimi për ta shtyrë seancën përtej afatit kushtetues ka shkaktuar reagime të ashpra nga partitë opozitare dhe ekspertët kushtetues. PDK-ja, LDK-ja dhe Aleanca kanë kundërshtuar vendimin e Deharit, duke kërkuar që seanca të vazhdonte brenda afatit, pra para mesnatës së së premtes. Ato kanë akuzuar shumicën parlamentare për shpërfillje të aktgjykimit të Gjykatës Kushtetuese. Por, ekspertët shprehen se mosrespektimi i afatit për konstituimin e Kuvendit përbën shkelje kushtetuese.