Zjarri që ka përfshirë prej dy ditësh fshatin Gojan i Madh në Pukë ka dalë jashtë kontrollit, ndërsa flakët kanë përfshirë edhe zonat pranë banesave. Në lagjen “Pepaj” janë djegur të paktën tre banesa. Ndërkohë, ka nisur evakuimi i banorëve që ndodhen në zonat e rrezikuara. Urdhri i parë për evakuimin e banorëve u dha ditën e djeshme nga Ministria e Mbrojtjes, pasi flakët po përparonin me shpejtësi në drejtim të banesave. Kryetari i Bashkisë Pukë, Rrok Dodaj, deklaroi më herët se zjarret dyshohet se kanë qenë të qëllimshme. Situata e zjarreve vijon të mbetet problematike edhe në zona të tjera të vendit. Gjatë orëve të fundit janë regjistruar 16 vatra zjarri në të gjithë territorin, nga të cilat 10 mbeten aktive dhe dy të tjera janë nën monitorim, sipas Ministrisë së Mbrojtjes. Ndërkohë, me forca të shumta vijon puna për shuarjen e zjarrit edhe në Malin e Milotit, në Kurbin.