Zjarrëvëniet e qëllimshme nga dora e njeriut kanë shkrumbuar qindra hektarë pyje e kullota në harkun kohor të vetëm pak ditëve, teksa lufta me flakët e zjarrit paraqitet ende kritike në Karaburun. Mëngjesin e kësaj të diele, katër autorë të vatrave të zjarrit janë arrestuar e një tjetër është shpallur në kërkim. Dy kushërinjtë Arben dhe Zarif Muskaj banues në Afrim i Ri, në Fier, janë autorët e dy zjarreve të shkaktuara në këtë zonë. Muskajt kanë rënë në prangat e policisë pasi akuzohen për zjarrvënie të qëllimshme në fshatin Gjorgos të Fierit, ngjarje e ndodhur në 6 gusht të këtij viti, si pasojë e së cilës janë shkrumbuar më shumë se 4 hektarë shkurre e pisha. Dy kushërinjtë janë gjithashtu autorët e zjarrëvënies së datës 28 korrik, në pyllin e fshatit Kreshpan. Dyshohet se zjarret kanë qenë tentativa të dy kushërinjve për të hapur kullota për bagëtitë.