Sistemi i ri kufitar i BE-së pothuajse ka trefishuar kohën që u duhet qytetarëve nga jashtë bllokut për të kaluar kontrollin e pasaportave edhe pas përmirësimeve të bëra, tha një shef në aeroportin kryesor të Romës. Kjo vjen ndërsa Ryanair ka paralajmëruar pasagjerët që udhëtojnë për në Evropë këtë verë të përgatiten për pritje të gjata. Policia kufitare në aeroportin Faro të Portugalisë i tha gjithashtu BBC-së se teknologjia e Sistemit të Hyrjeve dhe Daljeve kishte defekte, por këmbënguli se çdo radhë atje do të zhdukej shpejt. Komisioni Evropian ka thënë se në shumicën e aeroporteve të BE-së problemet janë të kufizuara dhe shtoi se do të vazhdojë të mbështesë shtetet anëtare në zbatimin e sistemit. Sistemi dixhital i Hyrjeve dhe Daljeve kërkon që qytetarët nga jashtë BE-së që hyjnë në zonën Shengen, duhet të regjistrojnë gjurmët e gishtërinjve dhe një foto. Informacioni kontrollohet ndërsa largohen. Shpesh kjo bëhet duke përdorur makina të pavarura, të automatizuara dhe ndonjëherë me oficerë kufitarë. Procesi dhe makinat e reja janë futur gradualisht që nga tetori. Disa aeroporte evropiane kanë parë radhë të gjatadhe orë të tëra pritje në kontrollin e pasaportave. Pasagjerët madje kanë raportuar edhe humbjen e avionëve për këtë shkak. Këtë javë, Ryanair tha se "zbatimi i dështuar i sistemit" po shkaktonte vonesa të panevojshme dhe radhë të gjata. Linja ajrore tha se pasagjerët nga Britania e Madhe duhet të llogarisin kohë shtesë për udhëtimin e tyre dhe të jenë të përgatitur për pritje të zgjatura në kontrollin e pasaportave. Ivan Bassato, shefi i aeroportit të romës thotë për BBC se integrimi me portat elektronike i ka "përmirësuar gjërat ndjeshëm". Por sërish, kompleksiteti i sistemit do të thotë që koha që u duhet shtetasve të huaj për të kaluar kufirin është rritur nga shtatë në 20 minuta.