Forcat rebele kanë nisur ofensivën e tyre më të madhe kundër qeverisë siriane në vite. Ata kanë arritur të marrin një pjesë të madhe të territorit në veri-perëndim të vendit, duke përfshirë pjesën më të madhe të qytetit të Aleppos, që ësthë dhe zona e dytë më e madhe e banuar në Siri. Ndërkohë ushtria po vijon tërheqjen përballë luftimeve të ashpra që po zhvillohen. Rebelët po vijojnë përparimin drejt jugut, ku pas qytetit të Hamës po synojnë të pushtojnë dhe Homs. Rebelët, po ashtu afër kufirit jordanez, thuhet se kanë marrë pjesën më të madhe të rajonit Deraa - vendlindja e kryengritjes së vitit 2011 kundër presidentit Bashar al-Assad. Lufta civile në vend e ka zanafillën në vitin 2011 ku një kryengritje paqësore pro-demokratike kundër Presidentit Assad në vitin 2011 u shndërrua në një konflikt që përfshiu gjithë vendin. Më shumë se gjysmë milioni njerëz janë vrarë dhe 12 milionë janë detyruar të largohen nga shtëpitë e tyre. Me ndihmën e Rusisë Iranit dhe milicive të mbështetura nga Irani, Asadi rifitoi kontrollin e qyteteve. Por kur lufta dukej se kishte marrë fund rebelët rinisën ofensivën.