Siria shpreson për "partneritet strategjik" me Ukrainën, i tha ministri i saj i Jashtëm homologut të tij ukrainas të hënën, ndërsa Kievi po përpiqet të ndërtojë lidhje me sundimtarët e rinj islamikë në Damask, me shpresën që të zbehë ndikimin rus. Rusia ishte një aleat i vendosur i presidentit të rrëzuar Bashar al-Assad dhe i ka dhënë atij azil politik. Moska ka thënë se është në kontakt me administratën e re në Damask, dhe po bisedon me të edhe për fatin e objekteve ushtarake ruse në Siri. “Do të ketë partneritete strategjike mes nesh dhe Ukrainës në nivelet politike, ekonomike dhe sociale, dhe partneritete shkencore po ashtu”, tha ministri i jashtëm i sapoemëruar i Sirisë, Asaad Hassan al-Shibani, pas takimit me Andrii Sybiha, homologun ukrainas. "Sigurisht që populli sirian dhe populli ukrainas kanë të njëjtën përvojë dhe të njëjtat vuajtje që ne duruam gjatë 14 viteve," shtoi ai, duke vendosur në dukje një paralele mes luftës brutale civile të Sirisë në vitet 2011-24 dhe pushtimit të territorit ukrainas nga Rusia. Sybiha, i cili gjithashtu takoi sundimtarin e ri de facto të Sirisë Ahmed al-Sharaa në Damask të hënën, tha se Ukraina do të dërgonte më shumë ndihma ushqimore në Siri pas mbërritjes së pritshme të 20 ngarkesave miell të martën. Presidenti ukrainas Volodymyr Zelenski njoftoi të premten e kaluar dërgimin e grupit të parë të ndihmës ushqimore të Ukrainës në Siri. Ukraina, një prodhues dhe eksportues global i drithërave dhe farave vajore, tradicionalisht eksporton grurë dhe misër në vendet e Lindjes së Mesme, por jo në Siri, e cila në epokën e Asadit importonte ushqim nga Rusia. Furnizimet ruse të grurit në Siri janë pezulluar për shkak të pasigurisë të shkaktuar nga instalimi i qeverisë së re në Damask dhe vonesat e pagesave, thanë burimet ruse dhe siriane për Reuters në fillim të dhjetorit.