Autoritetet e reja të Sirisë filluan të enjten një operacion sigurie në një rajon bregdetar ku 14 policë u vranë një ditë më parë, duke u zotuar se do të ndjekin "mbetjet" e qeverisë së rrëzuar të Bashar al-Assadit, që akuzohen për sulmin, njoftoi media shtetërore. Dhuna në provincën Tartous, pjesë e rajonit bregdetar që është shtëpia e shumë anëtarëve të sektit alavit të Asadit, ka shënuar sfidën më vdekjeprurëse deri më tani për autoritetet e udhëhequra nga islamistët sunitë, të cilët e rrëzuan diktatorin nga pushteti. Forcat e sigurisë të administratës së re nisën operacionin për të "kontrolluar sigurinë, stabilitetin dhe paqen civile, dhe për të ndjekur mbetjet e milicive të Asadit në pyje dhe kodra" në zonat rurale të Tartous, njoftoi agjencia shtetërore e lajmeve SANA. Anëtarët e pakicës alavite, një degë e islamit shiit, patën një ndikim të madh në Sirinë e udhëhequr nga Asadi, duke dominuar forcat e sigurisë që ai i përdori kundër kundërshtarëve të tij gjatë luftës civile 13-vjeçare dhe për të shtypur disidencën gjatë dekadave sundim nga shteti i tij policor. Hayat Tahrir al-Sham, ish dega e Al Kaedës që udhëhoqi fushatën që rrëzoi Asadin, është zotuar se do të mbrojë grupet e pakicave fetare, të cilët kanë frikë se sundimtarët e rinj mund të kërkojnë të imponojnë një formë konservatore të qeverisjes islamike. Tensione ka patur edhe në qytetin e Homsit, 150 km në veri të damaskut. Media shtetërore raportoi se është vendosur shtetërrethimi gjatë natës pas trazirave që pasuan protestat e anëtarëve të komuniteteve fetare alavite dhe shiite.