Aksidenti tragjik me 4 viktima e një të lënduar në gjendje të rëndë që ndodhi mbrëmjen e së enjtes në rrugën e Kombit në zonën e Rubikut, ka shuar një familje të tërë nga Kosova. Kryefamiljari Blerim Avdiaj 49-vjeç që drejtonte makinën të tipit Citroen, është përplasur me një mjet të tonazhit të rëndë, duke shënuar një nga ngjarjet më të rënda rrugore të këtij fillim viti. Si pasojë e këtij aksidenti humbën jetën Blerim Avdiaj, 45 vjeç, gruaja e tij Anjeza 34 vjeçe dhe dy fëmijët Klejdi 11 vjeç dhe Medina, 5 vjeçe. Nga familja Avdiaj ka mundur të shpëtoje më e vogla Violeta e cila është vetëm 3 vjeçe por ndodhet në gjendje të rëndë në spitalin e Traumës në Tiranë. Dyshimet e para janë se makina me të cilën udhëtonte familja nga Kosova ka tentuar të parakalojë automjetet para tij dhe nuk ka mundur ta shohë kamionin që vinte në drejtim të tij kur dhe ndodhi përplasja tragjike. Drejtuesi i kamionit po nga Kosova, është shoqëruar nga policia për t’u marrë në pyetje. Mësohet se familja Avdiaj ishte rezidente në Zvicër, ndërsa ishin nisur nga Kosova drejt Shqipërisë, ndërsa të dyja mjetet e përfshira në aksident ishin me targa të Kosovës.