Policia greke ka dalë në deklaratë për shtyp pas arrestimit të biznesmenit Ilir Shtufi në Selanik. Sipas autoriteteve greke, ai u arrestua në një hotel në periferi të qytetit të dytë më të madh grek. Arrestimi u krye nga oficerët e policisë së Nën-Drejtorisë për Luftimin e Krimit të Organizuar të Greqisë Veriore. Oficerët e kësaj nëndrejtorie ishin informuar më herët në rrugë operacionale pas daljes në sistem të urdhër-ndalimit nga drejtësia shqiptare. Hetimi zbuloi se Shtufi kishte hyrë në Greqi në orët e para të 12 qershorit në rrugë tokësore. Shërbimet policore kompetente u mobilizuan menjëherë, në kuadër të të cilave ai u lokalizua në një hotel në Selanik dhe u shoqërua për ekzaminim të mëtejshëm. Në të njëjtën kohë, nëpërmjet procedurave të përcaktuara të bashkëpunimit policor ndërkombëtar, u konfirmua se ndaj tij ishte në pritje një Njoftim i Kuq Ndërkombëtar për Kërkim nga Autoritetet e vendit të tij me qëllim arrestimin dhe ekstradimin e tij për vepra penale që lidhen me pjesëmarrjen në një organizatë të strukturuar kriminale dhe pastrim parash, që rrjedhin, ndër të tjera, nga rastet e trafikimit të drogës. Korrespondentët e Top Channel në Greqi raportojnë se Shtufi është arrestuar nga oficerë që i kanë folur shqip në hotelin ku po qëndronte, që dyshohet se ai ishte edhe pronari faktik.