Një alarm i ngritur nga autoritetet amerikane dhe i mbërritur në zyrën e policisë federale në Argjentinë, ngriti në këmbë autoritetet që ndërhynë me shpejtësi në banesën e një adoleshenti në në Buenos Aires, nën dyshimin se do të kryente një sulm terrorist në shkollën e tij. I riu, sipas mediave argjentinase, kishte pyetur gjatë ditëve të fundit ChatGPT se si mund të kryente një sulm ndaj shokëve të tij të shkollës. Informacioni fillimisht mbërriti në zyrat e FBI-së e më pas iu përcoll me urgjencë ambasadës amerikane në Argjentinë. Autoritetet thonë se i mituri kishte zhvilluar biseda me platformën e Inteligjencës Artificiale rreth një sulmi të mundshëm në shkollë gjatë vitit 2027. Rasti iu referua Prokurorisë Penale për të Mitur në Quilmes, e cila aktivizoi procedurat e saj të hetimit. Kontrolli në banesën e adoleshentit u krye dy ditë pas marrjes së sinjalizimit dhe policia sekuestroi telefona dhe sende të tjera që do t’i nënshtrohen verifikimit. Adoleshenti është proceduar për veprën e dyshuar të “frikësimit publik” dhe është thirrur në prokurori. Rasti po hetohet për të përcaktuar rrethanat dhe seriozitetin e kërcënimeve të raportuara.