Gjermania po tenton të joshë Partinë Republikane. Japonia po përdor zyrtarët e saj pro Donald Trumpit. Zyrtarët e Qeverisë meksikane po zhvillojnë bisedime me kampin e Trumpit dhe Australia po harton ligje që t’i bëjë të ditur Trumpit se vendi ka lidhje mbrojtjeje me SHBA-në. Edhe në vende të tjera të botës, aleatët e SHBA-së po ndërmarrin hapa për të mbrojtur apo avancuar interesat e tyre në rast se ish-presidenti Donald Trump, rikthehet në pushtet në zgjedhjet e nëntorit. Sondazhet e fundit sugjerojnë se Trump ka shanse që të kthehet në Shtëpinë e Bardhë. Aleatët duan që të shmangin goditjen që morën gjatë mandatit të parë të Trumpit, nga politika e tij “Amerika e Para”. Kjo politikë shkaktoi luftëra tregtare, lëkundje të aleancave të sigurisë, shtypje të emigrimit dhe tërheqje nga një marrëveshje botërore e klimës.