Qeveria synon të lehtësojë burokracitë për kalimin e titujve të pronësisë për tokat bujqësore. Ministria e Drejtësisë ka hedhur për konsultim publik draftin, sipas të cilit titujt e pronësisë për tokën bujqësore do të shpërndahen pa pagesë. Drafti vendos disa kushte dhe afate që duhen plotësuar nga personat që kanë në posedim tokën bujqësore, por nuk kanë tituj pronësie mbi të. Sipas draftit, Agjencia Shtetërore e Kadastrës harton listën e përdoruesve faktikë të tokës bujqësore për çdo ish-kooperativë dhe ish- ndërmarrje bujqësore, të cilën ia paraqet për miratim këshillit bashkiak në territorin e së cilës ndodhen pronat. Më pas, në bashkëpunim me pushtetin vendor verifikon sipërfaqet e pretenduara nga subjektet private dhe plotësimin e kushteve për kalimin e pronësisë. Në rastet kur subjekti kërkues plotëson kriteret, ASHK kryen procedurat administrative për kalimin në pronësisë së tokës bujqësore pa pagesë. Nëse brenda 30 ditëve nga data e njoftimit publik, subjekti nuk përmbush detyrimet procedurale, ASHK vendos pezullimin e procedurës administrative për kalimin në pronësisë për 60 ditë. Nëse edhe në përfundim të afatit 60 ditor nuk ka interesim, ose subjekti nuk përmbush detyrimet proceduriale, ASHK vendos refuzimin e kërkesës.