Rastet e hetuara përgjatë vitit të kaluar nga ana e Prokurorisë së Posaçme zbulojnë se të ardhurat e siguruara nga trafiku i drogës, armëve dhe emigrantëve pastrohen kryesisht përmes investimeve në pasuri të paluajtshme, biznese me qarkullim të lartë të parasë cash dhe aktivitete të tjera tregtare me kontroll të brendshëm të dobët. SPAK thotë se në tërësi, rastet e hetuara tregojnë se pastrimi i parave nuk bëhet më vetëm përmes rasteve sporadike dhe të paorganizuara, por është ngritur në një model arkitekturor të qëndrueshëm dhe të shumanshëm që mbështetet nga një organizim i sofistikuar, bashkëpunim ndërkombëtar dhe instrumente financiare alternative. Te këto të fundit, SPAK rendit në raport sistemin informal të transfertave të parave Havala, si dhe konvertimin e të ardhurave të siguruara kryesisht nga trafiku i kokainës në vendet e Bashkimit Europian në kriptovaluta.