Autoritetet në Greqi kanë thelluar hetimet për dronin ujor të mbushur me eksploziv të gjetur të enjten në një shpellë në ishullin e Lefkadës. Pas shpërthimit të kontrolluar të dielën, ministri grek I mbrojtjes, Nikos Dendias, tha se droni vinte nga një shtet I huaj, por pa e identifikuar. Teksa u përpoq të qetësonte frikën se Greqisë i mungonin aftësitë ushtarake për t'u mbrojtur nga një teknologji e tillë në zhvillim, Dendias tha se Greqia po krijon mundësitë që të pajisë marinën luftarake me dronët dhe sistemet anti-dronë më të zhvilluara që ekzistojnë aktualisht. Alarmi për dronin me rreze të gjatë veprimi, u ngrit edhe më shumë pasi u zbulua se ishte ngarkuar me rreth 100 kg eksploziv. incidenti ka ngritur pyetje mbi sigurinë detare në një shtet anëtar të BE-së që është më i prekshëm për shkak se ka vijën bregdetare më të gjatë të Evropës. Sakaq, opozita greke akuzoi qeverinë e qendrës së djathtë të Athinës se nuk ishte e përgatitur për t'u përballur me kërcënimin që paraqisnin armë të tilla.