Si sot 80 vite më parë, një bombardues amerikan B-29 lëshoi një bombë atomike mbi qytetin japonez të Hiroshimës. Ishte agimi i epokës atomike...Bomba që ra mbi Hiroshima, dhe ajo në Nagasaki dy ditë më vonë, kishin fuqi shpërthyese prej rreth 16 dhe 20 kilotonësh, një forcë mjaftueshëm e madhe për t'i dhënë fund Luftës së Dytë Botërore. Por krahasuar me armët bërthamore të sotme, ato ishin të vogla. "Ato ne tani i quajmë armë bërthamore me rendiment të ulët", thotë Alexandra Bell, presidente e Buletinit të Shkencëtarëve Atomikë, që bën fushatë për çarmatimin bërthamor. "Po flasim për shkatërrues qytetesh... këto janë me të vërtetë armët më të tmerrshme të krijuara ndonjëherë." Shumë nga armët e sotme bërthamore "me rendiment të lartë" janë dizajne termonukleare të testuara për herë të parë në vitet 1950. Me emrin e koduar "Mike", testi i parë i një bombe bërthamore u krye në vitin 1952 dhe cliroi të paktën 500 herë më shumë energji sesa bombat e hedhura në Japoni. Variantet e kokave bërthamore termonukleare Ë76 që aktualisht janë në arsenalin e SHBA-së dhe Mbretërisë së Bashkuar janë rreth gjashtë herë më të fuqishme se bomba e Hiroshimës. Vetëm një bombë e tillë, e hedhur mbi një qytet me madhësinë e Londrës do të rezultonte në më shumë se një çerek milioni vdekje. Koka bërthamore më e madhe në arsenalin aktual të Amerikës, B83, ka fuqi shpërthyese prej 1.2 megatonësh dhe do të vriste menjëherë mbi një milion njerëz. Por raketat moderne balistike ndërkontinentale (ICBM) janë projektuar për të mbajtur koka bërthamore të shumëfishta. Sarmat 2 i Rusisë, për shembull, mendohet se është e aftë të mbajë 10 megaton ngarkesë bërthamore. Nëntë vende të botës: SHBA-ja, Rusia, Kina, Franca, Mbretëria e Bashkuar, India, Pakistani, Koreja e Veriut dhe Izraeli, kanë armë bërthamore.