Ashtu siç ishte paralajmëruar, nga kete te shtune do të ndalohet qarkullimi i makinave tek ish- sheshi Shqiponja, në funksion të punimeve për projektin e Unazës së Madhe. Lajmi u bë i ditur nga ARRSH dhe Policia e Shtetit, në një konferencë të përbashkët, ku u prezantuan dhe devijimi i trafikut të mjeteve që duan të hyjnë apo dalin nga Tirana. Autoritete rrugore bene te ditur se për 4 muajt në vijim, kalimi në këtë aks do të jetë i mundur vetëm për ambulancat. Policia ka kërkuar nga drejtuesit e mjeteve që të shmangin këtë aks sa më shumë të jetë e mundur, ndërsa për qytetarët që vijnë nga Jugu i vendit, sugjerohet aksi Tiranë-Elbasan, ndërsa ata që vijnë nga Kavaja të përdorin rrugën e Ndroqit. “Plani është dinamik me ecjen e punimeve. Në rrugë do kenë akses vetëm ambulancat. Lutemi drejtuesve që vijnë nga Jugu i vendit të zgjedhin për kalim aksin Tiranë-Elbasan, kurse ata që vijnë nga Kavaja të përdorin aksin nga Ndroqi”, tha përfaqësuesi i policisë.