Rimbursimi 100 përiqnd i barnave per pacientët, që kanë rezultuar pozitiv ndaj koronavirusit, është shoqëruar me një fond shtesë në buxhetin e miratuar në kuvend për vitin 2021. Fondi shtesë arriti shifrën e 1.2 miliardë lekë. “Do të përfitojnë të gjithë qytetarët, qoftë nëse janë të siguruar, qoftë nëse nuk janë të siguruar. Nga sot ka filluar të funksionojë si skemë mjekimi në të gjithë strukturat tona të kujdesit parësor.” - është shprehur ministrja Manastirliu. Megjithëatë sipas të dhënave zyrtare të publikuara nga Ministria e Shëndetësisë, për vitin 2020 vetëm 1708 persona kanë përfituar trajtim me barna nga lista e barnave të rimbursueshme. Referuar të dhënave nga ky dikaster rezulton se për periudhën 19 nëntor, kur hynë në fuqi skemat e rimburimit deri në datën 31 dhjetor 2020 u regjistruan në total 27mijë e 693 raste me COVID-19. Pra në total vetëm 6 përqind e pacientëve me Covid kanë përfituar trajtime nga lista e barnave të rimbursuara. Paketa e barnave për trajtimin ambulator në banesë të të infektuarve parashikon rimbursimin 100% , të formës së lehtë dhe të moderuar të trajtimit, por jo më shumë se respektivisht 1 650 lekë dhe 10 900 lekë.