Pas lajmit të ndarjes nga jeta të Aneta Ramës, nënës së kryeministri shqiptar kanë qenë të shumta mesazhet nga bota e politikës shqiptare. Ndër ta kanë qenë edhe dy presidentët, ai I Shqipërisë Ilir Meta dhe ai I Kosovës Hashim Thaçi. “I dashur Edi, në këtë ditë të pikëllimit, por edhe të krenarisë, bashkëndjej me ju dhimbjen e thellë për ndarjen nga jeta të nënës Aneta. Ngushëllimet më të sinqerta në emër timin dhe të familjes”, shkruan Thaçi në rrjetet sociale. Ndërsa presidenti Ilir Meta shkruan: “Ngushëllimet më të sinqerta për familjen Rama, për ndarjen nga jeta të nënës dhe gjyshes së tyre të dashur Aneta. U prehtë në paqe!” Pas ndarjes nga jeta të nënës së tyre, kryeministri Edi Rama së bashku me vëllain e tij, Olsi Rama u kanë dhënë një mesazh të afërmve dhe miqëve të tyre. Duke i falënderuar për mesazhet e pafundme që u mberrijnë, ata kërkojnë mirëkuptim prej të gjithëve për pamundësinë e pritjes fizikisht të ngushëllimeve dhe zhvillimit të ceremonisë mortore. Kjo sipas tyre për shkak të situatës së krijuar nga pandemia.