Ushtria izraelite ka urdhëruar të dielën që më shumë rajone rreth qytetit të dytë më të madh të Gazës, Khan Junis, të evakuohen, teksa vazhdon ofensivën tokësore dhe ajrore. Sipas ushtrisë, në pjesën e dytë të jugut të Gazës fshihen liderë të Hamasit. Ky i fundit e udhëheq Gazën prej vitit 2007. Në zonat rreth Khan Junisit dhe Rafahut, është raportuar për bombardime intensive në orët e fundit. Pjesa më e madhe e 2.3 milionë banorëve të Gazës, janë duke u strehuar në jug, pasi Izreeli u ka kërkuar atyre të largohen prej zonës veriore, qysh në ditët e para të nisjes së luftës, tashmë dymujore. Me rikthim të luftimeve, janë shuar shpresat për vazhdim të një ndonjë armëpushimi të përkohshëm. Një pauzë njëjavore në luftime, që ka skaduar të premten, ka mundësuar lirimin e shumë pengjeve të marra nga Hamasi në Izreal, si dhe me lirimin e shumë palestinezëve prej burgjeve izraelite. “Ne do ta vazhdojmë luftën derisa t'i arrijmë qëllimet tona, dhe është e pamundshme të arrijmë qëllimet tona pa një operacion tokësor”, ka thënë kryeministri izraelit, Benjamin Netanyahu. Të dielën, ushtria izraelite u ka kërkuar banorëve në dhe rreth Khan Junisit, që të zhvendosen për sigurinë e tyre. Banorët kanë thënë se ushtria izrealite ka hedhur prej ajrit letra me mesazhet: Khan Junisi është zonë e rrezikshme e luftimeve. Vëzhguesit e Kombeve të Bashkuara kanë thënë se këto zona, që u është thënë banorëve të largohen, përbëjnë rreth një të katërtën e territorit të Gazës. Sipas tyre, në ato zona kanë banuar rreth 800.000 njerëz, para luftës. Para rinisjes së luftimeve, Shtetet e Bashkuara, aleatet më të ngushta të Izraelit, e kanë paralajmëruar vendin që të shmangë zhvendosjet masive.