Agjencia e Menaxhimit të emergjencave bëri të ditur se, gjatë 12 orëve të fundit, numri i zjarreve ka rënë ndjeshëm në Kosovë, pas pasdites së të shtunës, kur tha se “situata e zjarreve ishte e rënduar”. Sipas Agjencisë, tani aktiv është vetëm një zjarr në fshatin Trudë në Komunën e Prishtinës. Kjo agjenci kishte bërë të ditur të shtunën se për shkak të temperaturave të larta dhe erërave të forta, në shumë zona të Kosovës ishin përhapur zjarre. Një zjarrfikës ishte lënduar në Ferizaj gjatë ndërhyrjes për shuarjen e flakëve. “Raporti i Qendrës Operative të Agjencisë tregon një rritje në numrin e vatrave të zjarrit, me gjithsej 101 raste të raportuara vetëm në gjashtë orët e fundit. Prej tyre, 48 janë ende aktive, ndërsa 53 janë lokalizuar”, thuhej në njoftimin e Agjencisë. Presidentja e Kosovës, Vjosa Osmani, tha se gjendja është e vështirë dhe kërkon veprim të shpejtë e të bashkërenduar nga të gjitha institucionet. “Institucionet e Republikës së Kosovës janë të mobilizuara për të ofruar ndihmën e nevojshme. FSK-ja është në gjendje gatishmërie të plotë dhe e gatshme të ofrojë mbështetje të menjëhershme në rast se kërkohet nga autoritetet komunale apo ato qendrore për emergjencat civile”, tha Osmani.