Rritja e çmimit të naftës ka rënduar ndjeshëm xhepat e qytetarëve, por ka pasur efekt krejt të kundërt për buxhetin e shtetit, gjë e cila është reflektuar në shifrat e muajit mars. Në mars, çmimi i naftës arriti deri në 240 lekë për litër, nga 175 lekë në shkurt. Si pasojë, të ardhurat nga TVSH u rritën ndjeshëm, duke arritur në 1.93 miliardë lekë, ose 22% më shumë. Vetëm nga shtrenjtimi i çmimit, shteti përfitoi rreth 4.3 milionë euro më shumë nga TVSH. Edhe të ardhurat nga akciza shënuan rritje, pavarësisht ndryshimeve të vogla në importe. Ndërkohë, konsumatorët paguan më shumë. Për të njëjtën sasi nafte, ata shpenzuan rreth 11 milionë euro më tepër krahasuar me një muaj më parë, sic raporton Revista Monitor. Qeveria uli për pak ditë akcizën kur çmimi kaloi 220 lekë/litër, por kjo masë nuk zgjati. Ndërkohë, është premtuar kompensim për transportin publik, pas reduktimit të autobusëve në qarkullim, teksa trazirat në Lindjen e Mesme vijojnë të diktojnë çmimet.