Rastet e infektimeve me koronavirus në Evropë u rritën 9% gjatë kësaj jave, duke i dhënë fund një periudhe përmirësimi që nga fundi i janarit. Duke njoftuar keqësimin e situatës, shefi për Europën pranë Organizatës Botërore të Shëndetësisë tha se vendet evropiane duhet të rikthehen tek praktikat bazë.Dr. Hans Kluge u shpreh se në rajon janë regjistruar mbi 1 milionë raste të reja vetëm gjatë javës së fundit. Shtimi i ritmeve të infektimit, sipas specialistit, është më i dukshëm në Evropën Qendrore e Lindore. Më shumë se gjysma e këtyre zonave po përjeton shtim të ritmeve të përhapjes së sëmundjes, tha ai. duke mos e fshehur shqetësimin e tij, Kluge theksoi se “mbi një vit pas shfaqjes së pandemisë, sistemet tona shëndetësore nuk duhet të ishin në këtë gjendje.” Situata sipas tij kërkon vëmendje më të madhe ndaj protokolleve bazë. Zyrtari nënvizoi rëndësinë e masave për të parandaluar shfaqjen e varianteve të reja, shtimin e testimeve, izolimin e të infektuarve dhe përpjekje për të përshpejtuar vaksinimet. Në Britani dhe disa vende të tjera, ku sistemi shëndetësor po përballet me variantin britanik të koronavirusit, autoritetet kanë njoftuar rregullore të reja për të përshpejtuar modifikimin e vaksinave ekzistuese për t’iu përgjigjur mutacioneve.