Refxhei Tola, avokatja e 21 vjeçares që ka akuzuar mjekun kirurg në Korçë për abuzim seksual thotë se klientja e saj nuk është e vetmja viktimë e abuzuar prej tij. - Arsyeja pse kërkova të jap këtë deklaratë është sepse kemi marrë edhe disa denoncime të tjera, të cilat datojnë edhe para 33 vitesh, ndërsa i fundit është bërë 1 vit më parë, për të njëjtat raste abuzimi që doktori në fjalë ka kryer ndaj vajzave dhe grave të tjera. Është një rast i përsëritur. Si ka mundur të integrohet dhe të qëndrojë për një kohë kaq të gjatë një mjek në sistemin spitalor, duke dhënë shërbime për individë të ndryshëm, për vajza dhe djem, në kushte të caktuara? Është një çështje shumë sensitive. Avokatja kërkoi që drejtësia të reagojë, duke hetuar dhe duke vendosur para përgjegjësisë mjekin në fjalë. Avokatja u bëri thirrje grave të abuzuari prej mjekut që denoncojnë duke u garantuar anonimat të plotë.