Shteti që u vuri taksë milionerëve për të përkrahur mjekët, studentët e bizneset, tani e bëri atë realitet. Në Argjentinë, taksa e re për personat që kanë pasuri miliona dollarëshe hyri në fuqi të premten. Paratë e mbledhura prej saj do të përdoren për sistemin shëndetësor dhe rimëkëmbjen e biznesit të goditur rëndë nga pandemia. Individët me asete që kapërcejnë vlerën 200 milionë pesos apo 2.3 milionë dollarë, do të paguajnë taksë prej rreth 3 për qind për pasuritë e deklaruara brenda vendit dhe mbi 5 për qind taksë për ato që kanë jashtë kufijve. Nga kjo taksë preken rreth 12.000 pasanikë. Qeveria argjentinase shpreson të grumbullojë prej saj rreth 3 miliardë dollarë. Paratë, sipas BBC, do të përdoren edhe për të ndihmuar studentët me bursa si dhe për asistencë sociale. Senatorët e shtetit të Amerikës Jugore e miratuan muajin që shkoi atë që njihet tashmë si “taksa e milionerëve”. Argjentina është goditur rëndë nga pandemia, e cila ka ndikuar që të rritet ndjeshëm shkalla e varfërisë.