Grupi militant, Shteti Islamik ka marrë përgjegjësinë për sulmin në një kishë katolike romake në Stamboll, ku mbeti i vrarë një person. Sulmi ndodhi të dielën, gjatë një shërbese. Grupi ekstremist tha përmes një deklarate se ka kryer “ një sulm mbi një tubim të të pafeve të krishterë gjatë një ceremonie të tyre politeiste” në Kishën e Shën Marisë në lagjen Bujukdere të Stambollit. Ministri i Brendshëm i Turqisë, Ali Yerlikaya, tha në orët e vona të së dielës se dy persona, që ai tha se ishin anëtarë të Shtetit Islamik, janë arrestuar lidhur me sulmin. Sipas tij, njëri prej tyre ishte nga Taxhikistani dhe tjetri nga Rusia. Deklarata përmes së cilës Shteti Islamik mori përgjegjësinë për sulmin u publikua në Aamaq, krahun mediatik të ISIS-it, së bashku me fotografitë e dy personave të maskuar dhe të armatosur, të cilët, sipas grupit militant, kryen sulmin. Shteti Islamik tha se në sulm u vra një person dhe u plagos një tjetër, por autoritetet turke kanë deklaruar se një person është vrarë, por nuk ka të plagosur të tjerë. Yerlikaya tha se policia ka kryer kontrolle në 30 ndërtesa dhe ka arrestuar 47 persona, si pjesë e hetimit për këtë sulm. “Asnjëherë nuk do të tolerojmë ata që tentojnë të dëmtojnë paqen në vendin tonë”, tha ministri turk. Në fillim të janarit, 25 anëtarë të dyshuar të shtetit islamik u arrestuan në Turqi, nën dyshimet se kishin planifikuar sulme ndaj kishave dhe sinagogave. Shteti Islamik në të kaluarën nuk ka kryer sulme ndaj vendeve të kultit në Turqi, por ka kryer një sërë sulmesh vdekjeprurëse në mbarë vendin, përfshirë edhe një sulm në një klub nate më 2017 në Stamboll, kur u vranë 39 persona. Po ashtu, Shteti Islamik ka marrë përsipër edhe vendosjen e një bombe në ankara, në 2015-ën, ku mbetën të vrarë 109 persona.