Tre muaj pas vendimit të qeverisë për rritjen e pagave të adminstratës, por shtesa e premtuar nga qeveria para zgjedhjeve nuk ka kaluar për të gjitha kategoritë. Sipas vendimit të Qeverisë, mësuesit në muajin e prill do të përfitonin një shtesë page, të ndarë sipas kategorive. Megjithatë kjo nuk ndodhi atëherë. Nuk ndodhi as në maj dhe nuk ndodhi as në qershor. Më 16 qershor, Ministrja e Financave, Delina Ibrahimaj, shpjegoi se “javën e ardhshme të gjithë institucionet do të paguajnë shtesat e pagës për punonjësit për muajin prill dhe maj. Ndërkohë, nga muaji tjetër do të marrin pagat e rritura sipas vendimit të Këshillit të Ministrave”. Por edhe pas kësaj deklarate, një pjesë e madhe e mësuesve në të gjithë vendin denoncojnë se nuk kanë marrë ende shtesën e premtuar. Burime nga Ministria e Financave deklarojnë se nuk bëhet fjalë për mungesë fondesh, por për çështje burokratike dhe rakordimi të shtesave sipas vjetërsisë në punë dhe arsimimit për mësuesit me zyrat vendore arsimore.