Shtëpia e Bardhë ka kritikuar ashpër presidentin brazilian Luiz Inacio Lula da Silva për akuzat që ky i fundit kishte hedhur ndaj Shteteve të Bashkuara të Amerikës, se po “inkurajonin” luftën në Ukrainë. Lula tha pas një vizite në Kinë në fundjavë se SHBA duhet të fillojë të flasë për paqen në Ukrainë dhe e falënderoi për përpjekjet e tij. Presidenti brazilian, i cili e ka paraqitur veten si ndërmjetës për bisedimet e paqes për t'i dhënë fund konfliktit, tha gjatë fundjavës se "Shtetet e Bashkuara duhet të ndalojnë së inkurajuari luftën dhe të fillojnë të flasin për paqen". Komentet e Lula erdhën pas takimit me presidentin kinez Xi Jinping, i cili solli në vëmendje planin e paqes, të publikuar nga Kina në shkurt, që nuk kërkon në mënyrë eksplicite që Rusia të largohet nga Ukraina.