Një persona është arrestuar dhe tre punonjës të OSHEE janë ndaluar nga policia pas një aksioni kundër kultivimit të hashashit në ambiente të mbyllura në fshatin Barbullush të Bashkisë së Vaut të Dejës. Policia njoftoi arrestimin e shtetasit Aurel Çelaj, 31 vjeç dhe ndalimin e punonjësve të OSHEE, Flogert Hila, Aleksandër Gjovalini dhe Zef Nikolli, si dhe janë shpallur në kërkim katër persona të tjerë pas zbulimit të dy ambienteve të përshtatura për kultivmin e hashashit me anë të llambave. Sipas policisë, arrestimi i tyre është në vazhdën e operacionit ‘Neonët 5’, që ka identifikuar në total 9 ambiente të mbyllura ku është kultivuar hashashi në zonën e Vaut të Dejës. Në këtë aksion janë sekuestruar 580 bimë narkotike, gati 7.5 kilogramë e bimës e përpunuar dhe gati për shitje, qindra pajisje elektrike dhe tre celularë. Ndaj 31 vjeçarit rëndojnë akuzat e kultivimit të bimëve narkotike, ndërsa tre punonjësit e OSHEE janë referuar në prokurori me akuzën e shpërdorimit të detyrës.