Drejtori i një agjencie imobiliare në Angli është dënuar me 8 vite e 4 muaj burg, pasi përdori biznesin e tij për të mundësuar funksionimin e 19 shtëpive të barit. Pesë persona janë dënuar në total me më shumë se 14 vite burg nga Gjykata e Lutonit, pas një hetimi të policisë britanike kundër krimit të organizuar. Hetimi zbuloi një rrjet të sofistikuar kriminal, i cili vepronte përmes kompanisë imobiliare “Condor Estates”. Rrjeti ishte i përfshirë në kultivimin e kanabisit, falsifikimin e kontratave të qirasë, blerjen e pajisjeve dhe pastrimin e parave. Gjatë vitit 2024, autoritetet kontrolluan 20 prona, 19 prej tyre në Luton ku u zbuluan fabrika kanabisi, ndërsa në pronën tjetër u gjetën pajisje për kultivimin e bimëve. Në total, policia sekuestroi afro 2 mijë bimë kanabisi, me një vlerë të përllogaritur deri në 800 mijë paund. Sipas autoriteteve, prodhimi mund të gjeneronte kanabis me një vlerë në tregun e zi prej më shumë se 2 milionë paundësh brenda vitit. Në qendër të rrjetit ishte 46-vjeçari Sarfraz Farooq, drejtor i kompanisë, i cili ishte përgjegjës për dokumentet e falsifikuara, përfshirë kontrata fiktive qiraje për banesat që më pas përdoreshin për kultivimin e kanabisit. Ai shfrytëzonte banesa të pronarëve të ligjshëm, të cilët i besonin agjencisë për t’i dhënë me qira pronat e tyre. Bashkëpunëtori i tij, 42-vjeçari Uan Gogu, kishte një rol qendror në ngritjen e shtëpive të kanabisit. Në rrjet ishte i përfshirë edhe 33-vjeçari Zohaib Riaz Ali, i cili ndihmonte në sigurimin e pajisjeve. Ndërsa 76-vjeçari Mohammed Farooq kishte blerë me para në dorë një pronë, e cila më vonë u zbulua se përdorej si fabrikë kanabisi. Sipas autoriteteve britanike, operacioni tregon se aktiviteti i trafikut të drogës shkon shumë përtej shitësve. Sipas policisë, pas tyre qëndrojnë rrjete të organizuara individësh që sigurojnë pronat, falsifikojnë dokumentet, blejnë pajisje dhe mirëmbajnë shtëpitë e barit.