Një tjetër krim i rëndë brenda familjes është regjistruar në Greqisë, ku sërish, protagonistë janë shtetas shqiptarë. Ngjarja e rëndë ka tronditur komunitetin, ndërsa viktimë ka mbetur një 44-vjeçare, e cila dyshohet se u vra me thikë nga bashkëshorti i saj 58-vjeçar. Sipas informacioneve, çifti kishte nisur një debat, i cili më pas ka degjeneruar në dhunë. Ngjarja ka ndodhur në banesën e familjes, ndërsa në momentin e konfliktit kanë qenë të pranishëm edhe tre fëmijët e çiftit, dy prej të cilëve 16-vjeçarë, ndërsa njëri është i rritur. Dyshohet se debati mes bashkëshortëve nuk ishte i pari, pasi ata kishin pasur konflikte edhe më herët. Në rrethana që ende nuk janë bërë të qarta, 58-vjeçari ka marrë një thikë dhe ka goditur bashkëshorten e tij, duke i shkaktuar plagë të rënda. Gruaja nuk ka mundur t’u mbijetojë plagëve dhe ka ndërruar jetë në vendngjarje.