Shqiptarët vijojnë të mbeten populli më pak i lumtur në rajon. Raporti Global i Lumturisë, këtë vit na rendit në vendin e 89-të, teksa më të lumturit në Ballkanin Perëndimor janë shqiptarët e Kosovës. Raporti ka marrë në konsideratë cilësinë e jetesës, balancën mes jetës sociale, asaj private dhe punës, numrin e personave në familje, shërbimet sociale, shëndetësore dhe mirëqënien. Pothuajse në të gjitha këto kritere, Shqipëria renditet e fundit në rajon, por ajo që është më shqetësuese lidhet me rënien me 6 vende në këtë raport në tre vitet e fundit. Në tërësi, Raporti Global i Lumturisë thekson se zhvillimet gjeopolitike në Europë dhe në vende të tjera të botës kanë ulur nivelin e lumturisë në nivel global. Arsyet janë nga më të ndryshmet, që nga pasiguria prej konflikteve, deri tek frika për të mbetur vetëm, siç është rasti i të moshuarve në SHBA. Më të lumturit në këtë raport vijojnë të mbeten nordikët, ku finlandezët kryesojnë për të tetin vit me radhë, ndjekur nga danezët, suedezët dhe norvegjezët.